کہتے ہیں کہ ریاست ماں کےجیسی ہوتی ہے لیکن جب تربت ،بلوچستان سے تعلق رکھنے والے حیات بلوچ جو کراچی میں زیر تعلیم تھا، کی گولیوں سے چھلنی خون میں لت پت لاش زمین پر پڑی دیکھی اور لاش کے پاس نوجوان کے ماں باپ اپنے بیٹے کے اس طرح بہیمانہ انداز میں قتل کئے جانے پر بیٹھے تڑپتے دیکھے تو دل میں خیال پیدا ہوا نجانے اس نوجوان نے مرتے وقت اور اس کے ماں باپ نے اپنے بچے کے اپنے سامنے مارے جانے پر ریاست ماں کے بارے میں کیا سوچا ہو گا ؟؟ابھی تک کی اطلاعات کے مطابق ایف سی کے اہلکار نے علاقہ میں ایف سی کی دو گاڑیوں پر بم حملہ کے بعد اس نوجوان کو اس کے ماں باپ کے سامنے مار ڈالا۔ خبروں کے مطابق ایف سی نے متعلقہ اہلکار کو ایف آئی آر کے درج ہونے کے بعد پولیس کے حوالہ کر دیا۔ وفاقی وزیر برائے انسانی حقوق شیریںمزاری نے حیات بلوچ کے قتل کے واقعہ پر انکوائری کا مطالبہ کیا ہے۔ شیریں مزاری کے بیان کا شکریہ لیکن ایسے واقعات تو پہلے بھی ہوئے لیکن ریاست ماں نے مرنے والوں کے ساتھ انصاف کیا نہ مارنے والوں کے ساتھ۔ اس واقعہ پر تو ابھی تک ایک ہی وزیر نے آواز اٹھائی اور انصاف کا وعدہ کیا۔ کوئی ڈیڑھ دو سال پہلے ساہیوال میں تین معصوم بچوں کے سامنے اُن کے والدین، بڑی بہن اور ایک رشتہ دار کو دن دہاڑے مین شاہراہ پر سرکاری اہلکاروں نے گولیوں کی بوچھاڑ سے بے رحمی سے مار ڈالا اور کہا کہ سب دہشتگرد تھے۔ جو سرکاری اہلکاروں نے کہا وہ سب جھوٹ تھا.جو مارے گئے وہ سب کے سب بے گناہ تھے۔ سوچتا ہوں وہ تین چھوٹے بچے جن کے سامنے اُن کے ماں باپ اور بڑی بہن کو مارا گیا کیا وہ کبھی ریاست ماں پر بھروسہ کریں گے کیوں کہ اُس وقت بھی ایک نہیں کئی وزیروں بلکہ وزیر اعظم اور وزیر اعلیٰ نے بھی وعدہ کیا کہ ذمہ داروں کو کڑی سے کڑی سزا دی جائے گی، اُنہیں نشان عبرت بنایا جائے گیا۔ لیکن ایسا کچھ نہیں ہوا کیوں کہ تمام کے تمام اہلکار جنہوں نے دنیا کے سامنے یہ قتل کیے سب کو باعزت بری کر دیا گیا۔ وہاں موجود افراد نے اپنے موبائل سے اس واقعہ کی وڈیوز بھی بنائیں، گواہ بھی موجود تھے لیکن بہت کچھ ہوتے ہوئے بھی ساہیوال واقعہ کے ذمہ داروں کو عبرت کا نشان نہ بنایا جا سکا۔ یہی کچھ کراچی میں نقیب اللہ محسود کے ساتھ ہوا۔ وہ بھی بے گناہ تھا، بے قصور تھا۔ اُسے بھی دہشت گرد کا نام دے کر مار دیا گیا لیکن بعد میں ثابت ہو گیا کہ سب جھوٹ تھا۔ اس واقعہ میں ملوث پولیس ایس پی رائو انوار کے ساتھ جس لاڈلے انداز میں تحقیقات ہوئیں اور جس طرح اُس کے ساتھ انصاف کا مذاق ہوتے پورے پاکستان نے دیکھا ، اُس پر بھی ریاست ماں کے کردار پر سوال اُٹھے۔ 2011 میں کراچی میں ہی رینجرز اہلکاروں کے ہاتھوں ایک نوجوان سرفراز کا قتل ہوا جس کی وڈیو میڈیا پر وائرل ہوئی۔ اُس وقت کے چیف جسٹس نے اس واقعہ پر سوموٹو لیا، ذمہ داروں کو گرفتار کر لیا گیا، اُن کا ٹرائل ہوا اور اُنہیں عمر قید کی سزا بھی دے دی گئی۔ لیکن 2018 میں اُس وقت کے صدر ممنوں حسین نے سزا پانے والے رینجرز اہلکاروں کی سزا کو اپنے آئینی اختیارات استعمال کرتے ہوے معاف کر دیا اور یوں ریاست ماں کے کردار پر ایک بار پھر سوال اٹھا دیے گئے اور اُس کو ایک بار پھر شرمندہ کر دیا گیا۔ 9/11کے بعد جب اس ملک میں دہشتگردی میں بے پناہ اضافہ ہوا تو اس کے ساتھ ساتھ گمشدہ افراد اور ماورائے عدالت قتل کے واقعات بھی اتنے بڑھ گئے کہ رو ز کا معمول بن گئے۔ مارے جانے والوں میں کتنے معصوم تھے اور کتنے قصور وار اس کی کسی کو کوئی خبر نہیں۔ یہ بھی درست ہے کہ کئی بڑے بڑے دہشتگرد اور مجرم عدالتوں سے چھٹ جاتے ہیں جس کی وجہ سے ماورائے عدالت قتل کا رواج یہاں بڑھ گیااور اسے ریاست کی unwritten پالیسی سمجھا گیا۔ قانون بدلیں، عدالتی نظام کو ٹھیک کریں.پولیس اور دوسری سیکورٹی ایجنسیوں کے تحقیقاتی نظام کو بہتر بنائیں کیوں کہ اس سلسلہ کو بند ہونا چاہیے ورنہ نجانے کتنے بے قصور دہشتگردی کے جھوٹے الزام کی بنیاد پر مرتے رہیں گے۔ جو سرکاری اہلکار بے قصور افراد کو مارنے کے الزام میں پکڑے جائیں اُنہیں سخت سے سخت سزا دی جائے تاکہ ریاست ماں کی محبت سب کو ملے اور اس پر اعتبار قائم رہے۔ ( کالم نگار کے نام کے ساتھ ایس ایم ایس اور واٹس ایپ رائے دیں 00923004647998 ) 

ریاست ماں کو شرمندہ مت کرو

وزیراعظم عمران خان نے اسامہ بن لادن کو شہید کہا تو ایک تنازع کھڑا ہو گیا۔ سیاسی جماعتوں خصوصاً پیپلز پارٹی اور نون لیگ کے کچھ رہنمائوں کیساتھ ساتھ ساتھ میڈیا کے کئی افراد کو تو جیسے آگ ہی لگ گئی ہو۔ تحریک انصاف کا ایک طبقہ بھی پریشان دکھائی دیا اور صفائی پیش کرتا رہا کہ خان صاحب کی زبان پھسل گئی۔ اگرچہ کسی نے یہ الفاظ تو نہیں کہے لیکن محسوس یہ ہوا جیسے یہ سب لوگ چیخ چیخ کر کہہ رہے ہوں کہ عمران خان کی ہمت کیسے ہوئی کہ ایک شخص جس کو امریکا نے دہشت گرد قرار دے دیا ہو۔اُسے شہید پکارا جائے اور ایسا کہنے والا پاکستان کا وزیراعظم کیسے ہو سکتا ہے۔ ہماری سیاست اور ہمارے میڈیا کا جو مائنڈ سیٹ ہے وہ تو واضح ہے، یعنی کون شہید ہے کون دہشت گرد اس کا فیصلہ تو صرف امریکا نے کرنا ہے، جس کے ہاتھ لاکھوں مسلمانوں کے خون سے رنگے ہوئے ہیں اور جس نے ایک ایک کرکے کئی مسلمان ممالک کو بدامنی اور خون خرابہ کی طرف دھکیلا۔ نائن الیون کے بعد ہم نے ثابت کیا کہ ہم تو وہ کہیں گے اور وہ کریں گے جو امریکا کہتا ہے اور جو وہ چاہتا ہے۔ اسلام کو بھی ہم نے امریکا کی نظر سے ہی دیکھنا ہے۔ جہاد کی تو امریکا کی نظر میں کوئی گنجائش ہی نہیں اور اس لیے ہم بھی جہاد کی بات نہیں کرتے۔ ہم بات کریں گے تو روشن خیالی کی، موڈریٹ اسلام کی کیونکہ امریکا ہم سے یہی سننا چاہتا ہے۔ عمران خان سے ہزار اختلاف لیکن اُن میں یہ خوبی ہے کہ وہ جو اسلام کے بارے میں صحیح سمجھتے ہیں کھل کر اُس پر بات کرتے ہیں۔ اُنہوں نے اسامہ بن لادن کی شہادت کے حوالے سے بات کر کے امریکا کی زبان بولنے سے انکار کیا جو یقیناً ایک بہت بڑا ’’جرم‘‘ ہے۔ عمران خان کے اس ’’جرم‘‘ پر سیخ پا ہونے والوں نے اسامہ بن لادن کو پاکستان میں دہشت گردی اور اس کے نتیجے میں مارے جانے والے ہزاروں افراد کا ذمہ دار ٹھہرایا۔ یہ بھی کہا جا رہا ہے کہ اسامہ اور تحریک طالبان پاکستان ایک ہی سکے کے دو رخ تھے اور دونوں میں کوئی فرق نہیں تھا۔ہمارا مسئلہ یہ ہے کہ ہم امریکا کی زبان یعنی اُس کے پروپیگنڈے پر تو یقین کریں گے لیکن اگر امریکا کی طرف سے ہی کوئی ایسی بات سامنے آئے جو اُس پروپیگنڈے کے برعکس ہو تو اُس کا نہ تو حوالہ دیں گے اور نہ ہی اسے کوئی اہمیت۔ ایبٹ آباد واقعہ کے کوئی سال بعد 3مئی 2012ء کو ڈان اخبار کے صفحہ اول پر ایک خبر شائع ہوئی، جس کی سرخی ’’Al Qaeda's relations with Pakistan were fraught with difficulties‘‘ تھی۔ یہ خبر ڈان کے واشنگٹن سے سینئر رپورٹر انور اقبال صاحب کی تھی جس میں ایبٹ آباد آپریشن کے دوران قبضہ میں لی جانے والی اسامہ بن لادن کی دستاویزات کا حوالہ دیا گیا تھا۔ خبر کے مطابق ان دستاویزات کو امریکی فوج نے جاری کیا۔ اس خبر میں لکھا تھا کہ دستاویزات کے مطابق القاعدہ کے تحریک طالبان پاکستان سے شدید اختلافات تھے اور ان اختلافات کی وجہ تحریک طالبان پاکستان کا ملک میں دہشت گردی کے واقعات میں شامل ہونا تھا۔ اس خبر میں بتایا گیا کہ القاعدہ کے دو رہنمائوں نے اُس وقت کے تحریک طالبان کے رہنما حکیم اللہ محسود کو خط لکھ کر اپنی خفگی کا اظہار بھی کیا اور ٹی ٹی پی کے نظریہ، طریقہ کار اور رویہ کو ناپسندیدہ قرار دیا۔ اس خط میں ٹی ٹی پی کو یہ تنبیہ بھی کی گئی تھی کہ اگر تحریک طالبان پاکستان نے اپنا رویہ نہ بدلا جو اسلامی تعلیمات کے بھی خلاف ہے، تو القاعدہ اس پر کوئی عوامی اقدام کرے گی۔ دستاویزات سے یہ بھی ظاہر ہو رہا تھا کہ اسامہ بن لادن کو 2010ء میں نیویارک اسکویئر میں ٹی ٹی پی کے فیصل شہزاد کے ناکام حملہ کرنے کی کوئی پیشگی اطلاع نہ تھی بلکہ اسامہ کو اس بات پر مایوسی ہوئی کہ فیصل شہزاد جس نے امریکی شہریت کے لیے حلف لیا تھا، نے نہ صرف اپنے عہد کی خلاف ورزی کی بلکہ جہاد کے تصور کو بھی خراب کیا۔بظاہر اسامہ یا کسی دوسرے القاعدہ رہنما کی طرف سے لکھے گئے ایک اور خط کا حوالہ دیتے ہوئے خبر میں پاکستانی طالبان کی شہرت کے بارے میں ’’Black Reputation of Pakistani Taliban‘‘ کے الفاظ لکھے گئے۔ اس خط میں یہ بھی لکھا گیا کہ ٹی ٹی پی مذہبی اور قبائلی رہنمائوں کے ساتھ ساتھ مساجد اور عوامی مقامات پر حملے کرتی ہے جس میں عورتوں اور بچوں سمیت بےگناہ افراد کو نشانہ بنایا جاتا ہے۔ ان دستاویزات میں ایک ازبک جنگجو کے وڈیو پیغام جس میں لال مسجد کے واقعہ کے خلاف انتقام کے طور پر پاکستان بھر کی مساجد میں بم حملے کرنے کا پیغام دیا گیا تھا، کو بھی غلط قرار دیا اور یہ کہا کہ بھلے مسجد کسی فوجی یا حکومتی علاقہ میں ہو، اُس پر حملہ نہیں کیا جا سکتا۔ نیز یہ کہ مساجد پر حملے اور معصوموں کا خون بہانے کا تعلق ہمیشہ بدترین افراد اور گروہوں سے رہا۔ پاکستان اور افغانستان کے حوالے سے لکھا گیا:I have no doubt that what is happening to the Jihandi movement in these countries is not misfortune, but punishment by God on us because of our sins and injustices and because some of us are silent over these sins.ترجمہ:مجھے کوئی شک نہیں کہ جو ان ممالک میں جہادی تنظیموں سے ہو رہا ہے وہ بدقسمتی نہیں بلکہ اللہ تعالیٰ کی طرف سے سزا ہے ہمارے گناہوں اور ہماری ناانصافیوں کی کیونکہ ہم میں سے کچھ ان گناہوں پر خاموشی طاری کیے ہوئے ہیں۔اس کے بعد خط میں لکھا گیا کہ ایک مجاہد کو امیر کی تقلید نہیں کرنی چاہیے، اگر امیر کا حکم اللہ تعالیٰ کی نافرمانی کے طرف لے جانے والا ہو۔ خط میں یہ بھی لکھا گیا کہ اگر کوئی شخص چند دینار (رقم) کا مقروض ہو کر مر جائے تو اُس کی بخشش ممکن نہیں جب تک کہ اُس قرض کی ادائیگی نہ ہو جائے۔ تو ایسے میں اُس شخص کی بخشش کیسے ممکن ہے جو بہت سے معصوموں کو مار دے یا مسلمانوں کا ناانصافی سے خون بہائے۔ خط میں پاکستانی طالبان اور افغان طالبان کے رہنمائوں سے کہا گیا کہ وہ ان باتوں پر غور کریں اور قتل و غارت کو چھوڑ دیں۔ (کالم نگار کے نام کیساتھ ایس ایم ایس اور واٹس ایپ رائےدیں00923004647998) 

شہید کون، دہشت گرد کون، فیصلہ امریکا کا

1971ء کے مشرقی پاکستان کے سانحہ پر حمود الرحمٰن کمیشن کی رپورٹ پڑھیں تو سر شرم سے جھک جاتا ہے۔ پاکستان کو جب دولخت کیا جا رہا تھا تو اُس وقت کے ہمارے حکمران عیاشیوں میں مبتلا تھے۔ رپورٹ میں اُن عورتوں کی تفصیل تاریخوں کے ساتھ دی گئی ہے جو ہمارے بدکردار حکمرانوں کی عیاشی کے لیے اُن کی سرکاری رہائشگاہوں میں رات گزارنے کے لیے آتی تھیں۔ میں اپنے اس کالم میں کسی فرد کا نام نہیں لکھنا چاہتا لیکن حمود الرحمٰن کمیشن رپورٹ ایک واحد سرکاری تحقیقاتی رپورٹ ہے جس میں مشرقی پاکستان کے سانحہ کے مختلف عوامل میں شامل ہمارے حکمرانوں کے ذاتی کردار پر بھی روشنی ڈالی گئی ہے۔ ان کرداروں کے بارے میں پڑھ کر گھن آتی ہے اور بندہ حیران ہو جاتا ہے کہ اس قدر بدکردار اور گندے لوگ کس طرح اعلیٰ ترین عہدوں پر پہنچ جاتے ہیں۔ مجھے اس رپورٹ کو پڑھے کافی عرصہ ہو گیا لیکن رپورٹ کے اس پہلو کا خیال میرے ذہن میں اُس حالیہ تنازع کی بنا پر آیا جس میں پاکستان میں رہنے والی ایک غیر ملکی خاتون نے پیپلز پارٹی کے کچھ اہم رہنمائوں پر اپنے ساتھ مبینہ زیادتی کے الزامات لگائے اور کہا کہ اُس کے ساتھ زیادتی گزشتہ پی پی پی کے دورِ حکومت کے دوران کی گئی۔اس خاتون کے الزامات کو متعلقہ پی پی پی رہنمائوں نے جھوٹ کہہ کر جھٹلا دیا۔ ہو سکتا ہے ایسا ہی ہو لیکن یہ وہ الزامات ہیں جن کا گاہے گاہے سامنا ہمارے کئی سیاسی اور فوجی حکمرانوں کو کرنا پڑتا ہے۔ میں ایسے معاملات پر لکھنے سے عموماً گریز کرتا ہوں اور یہ بھی مناسب نہیں سمجھتا کہ چاہے کتنی ہی سچی خبر ہو، کسی کی ذاتی زندگی کے بارے میں لکھا جائے۔ مجھے ثبوتوں کے ساتھ چند سیاسی رہنمائوں کی ذاتی زندگی کے بارے میں مواد دیا گیا جو میڈیا کے لیے بہت بڑی خبر بھی بن سکتا تھا لیکن میں نے ایسی خبریں دینا پسند نہ کیا اور نہ ہی ایسے کسی سورس کی حوصلہ افزائی کی۔ جس طرح موجودہ تنازع پر میڈیا میں خبریں نشر کی جا رہی ہیں مجھے اس پر بھی اعتراض ہے۔ لیکن ایک مسلمان اور ایک پاکستانی ہونے کی حیثیت سے مجھے یہ فکر ضرور لاحق ہے کہ ایسا کیوں ہے کہ ہمارے کئی سابق اور موجودہ حکمرانوں اور سیاسی رہنمائوں کے بارے میں ایسی باتیں کی جاتی ہیں۔جو لوگ حکمرانی کریں، اعلیٰ عہدوں پر فائز ہوں یا اُن کا تعلق سیاست سے ہو، اُن کو خاص طور پر باکردار ہونا چاہیے۔ کسی کی ذاتی زندگی میں ہمیں جھانکنے اور ٹوہ لگانے کی ضرورت نہیں لیکن اگر ہمارے حکمران، اعلیٰ عہدوں پر فائز افراد اور سیاسی رہنمائوں میں بدکرداری پائی جاتی ہو تو یہ ریاست کیساتھ ساتھ پورے معاشرے کے لیے بھی خطرناک ہو گا۔ افسوس کا مقام یہ ہے کہ اگر کوئی شخص بدکردار ہے اور اُس کی بدکرداری کے بارے میں اُس کے اردگرد کے لوگ جانتے بھی ہیں تو اُسے سیاست، سرکاری اور دوسرے شعبوں میں آگے جانے سے نہیں روکا جاتا۔آئین پاکستان کے مطابق کوئی شخص اگر باکردار نہیں تو وہ پارلیمنٹ کا رکن نہیں بن سکتا لیکن آئین کی ان شقوں پر عمل ہی نہیں کیا جاتا۔ ماضی کا ایک ممبر قومی اسمبلی شراب و شباب کے اپنے شوق کا کھل کر میڈیا پر بیان کرتا رہا لیکن اُسے کسی نے نہیں پوچھا نہ اپنی سیاسی جماعت نے نہ ہی ریاست کے کسی ادارہ نے۔ ریاست کا یہ وہ رویہ ہے جس نے بدکرداری کو گناہ یا برائی ماننا چھوڑ دیا۔ عمومی طور پر اب تو اگر کسی کے بارے میں یہ یقین بھی ہو کہ وہ اپنی ذاتی زندگی میں بہت گندا ہے تو اُس پر کسی کو کوئی اعتراض نہیں ہوتا اور ایسا شخص سیاست میں ہو یا ریاست کا کوئی اعلیٰ عہدیدار، اُس کے اس پہلو کو نظر انداز کیا جاتا ہے۔ اخباروں میں لوگوں کی ذاتی زندگی کے حوالے سے اچھالی جانے والی گندگی اور ایسی خبروں پر تبصروں کے بجائے اس خرابی کا تدارک اور کوئی حل بھی تلاش نہیں کیا جاتا اور یہی آج بھی ہو رہا ہے۔میڈیا ایسی خبروں پر خوب سنسنی پھیلا کر اپنی ریٹنگ تو ضرور بڑھا رہا ہے لیکن اگر یہ بات کی جائے کہ آئین کے آرٹیکل 62، 63 کا نہ صرف سیاست دانوں اور ممبرانِ پارلیمنٹ پر سختی سے نفاذ کیا جائے بلکہ ان آئینی شقوں کا دائرہ کار ہر اہم سول و فوجی عہدیدار پر کیا جائے تو میڈیا کا ایک بااثر طبقہ اس اقدام کی مخالفت کرے گا۔ سیاسی جماعتیں اپنے مخالفین کے بارے میں ایسی خبروں پر تو خوب مسالا لگا لگا کر تبصرے کرتی ہیں لیکن جب کہا جائے کہ آئین کی شقوں پر عمل درآمد کرتے ہوئے کسی بدکردار کو الیکشن میں پارٹی ٹکٹ نہ دیں تو کہتے ہیں کہ یہ آئینی شقیں تو قابل عمل ہیں ہی نہیں۔ ایسی دو نمبری کے ہوتے ہوئے ہم باکردار سیاسی اور سرکاری قیادت کیسے حاصل کر پائیں گے؟؟ (کالم نگار کے نام کے ساتھ ایس ایم ایس اور واٹس ایپ رائے دیں 00923004647998) 

اعلیٰ عہدوں پر فائز بدکردار

کورونا نے اچھے اچھوں کو سفید پوش بنا دیا ہے، اس لیے جہاں تک ہو سکے اپنے عزیزوں، رشتہ داروں، ہمسایوں، جاننے والوں میں ایسے افراد کو ڈھونڈیں اور اُن کی خاموشی سے مدد کریں کیونکہ کچھ بھی ہو‘ وہ نہ مانگیں گے، نہ آٹا، چینی اور چاول لینے کے لیے کسی قطار میں کھڑے ہوں گے۔ غریب تو پہلے ہی واضح تھے، اُن میں سے بہت سے تو مانگ بھی لیتے ہیں، دوسرے اُن کی مدد بھی کر دیتے تھے لیکن کورونا اور لاک ڈائون نے بہت بڑی تعداد میں ایسا طبقہ پیدا کر دیا ہے جو نہ ہاتھ پھیلائے گا، نہ مانگے گا۔ اُن کی مشکل اگر کوئی معلوم کرنا چاہے تو اُس کے لیے اُن کے چہروں کو پڑھنا پڑے گا کیونکہ وہ سوال نہیں کریں گے، لیکن چہرے سے بھی حال کیسے معلوم کریں کیونکہ لاک ڈائون کی وجہ سے اب تو قریبی رشتہ داروں کا بھی آپس میں ملنا جلنا بہت کم ہو چکا ہے۔ اس لیے ہو سکتا ہے کہ ہمارے قریبی عزیز، رشتہ دار، ہمسایوں اور جاننے والوں میں ایسے لوگ موجود ہوں جو پہلے اپنا گزر بسر بہتر انداز میں کر لیا کرتے تھے لیکن کورونا نے اُن کے لیے مالی مشکلات کو بہت بڑھا دیا ہو۔ اگر کسی نے پیسہ بچا کر رکھا ہوا تھا تو پھر تو ٹھیک، کچھ عرصہ جب تک سیونگز ہیں، گزارا ہو سکتا ہے لیکن اُن کا کیا بنے گا جو پہلے اپنے ذریعہ معاش سے اچھا گزارا کر لیتے تھے لیکن اب چونکہ چند ماہ سے سب کاروبار بند پڑے ہیں، اس لیے اُن کے حالات جو پہلے اچھے تھے، یکدم خراب ہو گئے۔ لاکھوں نہیں شاید کروڑوں افراد پاکستان میں بیروزگار ہو گئے اور ان میں ایسے لوگوں کی تعداد بہت بڑی ہے جو سوال کرنے والوں میں نہیں آتے۔حکومت، فلاحی ادارے اور مخیر حضرات‘ سب غریب طبقہ کے لیے جو بس میں ہے، کر رہے ہیں، اُنہیں کیش دیا جا رہا ہے، کھانے پینے کی اشیاء کے پیکٹ بھی تقسیم کیے جا رہے اور گھروں تک پہنچائے جا رہے ہیں لیکن اس میں وہ طبقہ شامل نہیں جس کا میں ذکر کر رہا ہوں۔ اس طبقہ کی مدد امداد حکومت اور فلاحی اداروں کے لیے کرنا بھی اس لیے مشکل ہے کہ اُنہیں identify کیسے کیا جائے کیونکہ وہ سوال کریں گے اور نہ ہی تقسیم ہونے والی خوراک کے لیے کسی قطار میں کھڑے ہوں گے۔ اس طبقہ کی تلاش اور اُن کی امداد کا واحد طریقہ یہ ہے کہ ہم میں سے ہر فرد اپنے اردگرد دیکھے، اپنے بہن بھائیوں، رشتہ داروں اور ایسے ہمسایوں اور جاننے والوں کے حالات خاموشی سے معلوم کرنے کی کوشش کرے تاکہ جو ضرورت مند ہو اُس کو ادھار یا قرض حسنہ دے دیں یا اُس کی ویسے مدد کریں۔لاک ڈائون اور سخت لاک ڈائون کے حق میں بات کرنے والوں کی اکثریت اُن افراد کی ہے جن کے اپنے حالات اللہ کے کرم سے اچھے ہیں یا اُن کا تعلق اُس تنخواہ دار طبقہ سے ہے جن کی نوکریاں ابھی لگی ہوئی ہیں، ورنہ یقین جانیں اس کورونا نے جو حالات پیدا کر دیے ہیں اُس سے اگر دنیا بھر میں بیماری اور مرنے کا خوف پیدا ہو گیا ہے تو دوسری طرف غربت میں اضافہ اور کاروبار کے بند ہونے سے بڑی تعداد میں لوگوں کو اس بات کی فکر لاحق ہو گئی ہے کہ وہ کھائیں گے کہاں سے۔ یہاں تو اچھے خاصے کاروباری افراد کو لاکھوں کروڑوں کا نقصان ہو چکا ہے، ہر گزرتے دن کے ساتھ کاروبار سے جڑے افراد کے حالات بد سے بدتر ہوتے جا رہے ہیں۔کورونا تو ایک بیماری ہے جس کا وار نجانے ہم پر کتنا سخت ہوگا اور جو حالات ابھی تک سامنے آئے ہیں، مغرب اور امریکا کے برعکس ہمارے حالات کافی بہتر ہیں جس پر ہمیں اپنے رب کا شکر ادا کرنا چاہیے اور دعا کرنی چاہیے کہ یہاں حالات زیادہ خراب نہ ہوں لیکن یاد رکھیں کہ یہ لاک ڈائون کی پالیسی اگر امریکا و یورپ میں لمبے عرصے تک نہیں چل سکتی اور وہاں نرمی کی جا رہی ہے اور عوام بھی احتجاج پر اتر آئے ہیں تو یہاں تو حالات ہی بہت مختلف ہیں۔ پہلی بات تو یہ کہ ہمارا لاک ڈائون سخت ہو ہی نہیں سکتا جس کا مظاہرہ ہم پورے ملک میں دیکھ چکے ہیں۔ دوسری بات، دو ماہ لاک ڈائون کو ہو چکے لیکن اب بھی ایک طبقہ یہی کہہ رہا ہے کہ سخت لاک ڈائون جاری رکھیں۔ مجھے اس طبقہ کے اخلاص پر شک نہیں لیکن یہ صرف ملک کی معیشت کا مسئلہ نہیں بلکہ اصل ڈر یہ ہے کہ لوگوں کی معاشی زندگی اتنی خراب نہ ہو جائے کہ خدا نخوستہ یہاں لوٹ مار اور خانہ جنگی کے حالات پیدا ہو جائیں۔ لمبے عرصہ کے لاک ڈائون کی وجہ سے ایسے ہی حالات پیدا ہونے کا خطرہ ہے، ہر آنے والا دن مشکل سے مشکل ہوتا جائے گا۔ نہ حکومت اور نہ ہی فلاحی ادارے ایک لمبے عرصہ تک کے لیے اُس بھوک کو مٹا سکتے ہیں جو لاک ڈائون کی وجہ سے روز بروز زیادہ سے زیادہ ہوتی جا رہی ہے۔ اس لیے میری وفاقی و صوبائی حکومتوں کے ساتھ ساتھ تمام ذمہ داروں سے گزارش ہے کہ کاروبار کو زیادہ سے زیادہ کھولیں، معمولاتِ زندگی کو بحال کریں، لوگوں کو اپنا روزگار کمانے دیں۔ کوشش اور تمام تر توجہ صرف اس بات پر دیں کہ ممکنہ حد تک جو احتیاط ہو سکتی ہے، اُس کا نفاذ کریں۔ ایسا نہ ہو کہ کورونا سے بچاتے بچاتے لوٹ مار اور سنگین لا اینڈ آرڈر کے حالات پیدا کر دیں۔ (کالم نگار کے نام کے ساتھ ایس ایم ایس اور واٹس ایپ رائے دیں 00923004647998) 

کورونا خطرناک یا لاک ڈاؤن

سوشل میڈیا پہ کراچی کے ایک بازار میں رونما ہونے والے ایک واقعہ کی وڈیو وائرل ہے۔ وڈیو میں دیکھا جا سکتا ہے کہ چند خواتین کسی مارکیٹ کی دوسری منزل سے پائپوں اور شیڈوں کے سہارے لٹک لٹک کر نیچے اترنے کی کوشش کر رہی ہیں۔ نیچے کھڑے کچھ مرد نیچے اترنے میں اُن کی اس انداز میںمدد کر رہے ہیں کہ اُن خواتین کو کیچ کیا جائے۔ وہاں مردوں کا ایک ہجوم لگا ہے اور موبائل کیمروں سے وڈیوز بھی بنائی جا رہی ہیں۔ سوشل میڈیا کی معلومات کے مطابق یہ خواتین شاپنگ کے لیے گئی تھیں لیکن پولیس نے بازار، دکانیں بند کروا دیں تو وہ اندر ہی بند ہو گئیں جس کے بعد اُنہیں اس انداز میں پہلی منزل سے چھلانگیں لگا لگا کر باہر نکلنا پڑا۔ کچھ لوگوں کا کہنا ہے کہ یہ ایک پرانی وڈیو ہے اور ایک مساج سنٹر کی ہے جسے بند کیے جانے پر اس مساج سنٹر میں کام کرنے والی خواتین کو اس طرح نکالا جا رہا ہے۔ واقعہ کی حقیقت جو بھی ہو، عورتوں کو وہاں سے نکالنے کا یہ طریقہ نہیں۔ وہ جو بھی تھیں اُس احترام کی ضرور مستحق تھیں جس کی ہمارا دین تعلیم دیتا ہے اور جس کی ہمارے معاشرے میں روز بروز کمی ہوتی جا رہی ہے۔ مجھے افسوس اُن مردوں پر ہوا جنہوں نے اس واقعہ کو ایک تماشا بنا لیا، جسے نہ صرف دیکھنے کے لیے وہ وہاں جمع ہوئے بلکہ وڈیو میں اس واقعہ کی رننگ کمنٹری بھی سنائی دی۔ وڈیو بنانے والے نے ان خواتین کی وہاں سے جاتے ہوئے قریب سے وڈیو بنانے کی کوشش بھی کی تاکہ جس قدر ممکن ہو سکے اُنہیںIdentifyکیا جا سکے۔ مجھے یہ مرد تماش بین اور بے حیا لگے، جن کو اتنی شرم محسوس نہ ہوئی اور عورتوں کو مہذب طریقہ سے نیچے اتارنے کے بجائے انہیں تماشا بنا دیا اور یہ تماشا دیکھنے کے لیے وہاں ہجوم جمع ہو گیا۔ ہو سکتا ہے کہ چند ایک واقعی مدد کرنا چاہ رہے ہوں لیکن کیا اُن خواتین کو وہاں سے نیچے اتارنے کے لیے کسی سیڑھی کا یا کوئی دوسرا انتظام نہیں ہو سکتا تھا کہ اُنہیں پائپوں اور شیڈوں کے ساتھ لٹک لٹک کر چھلانگیں نہ لگانا پڑتیں۔ پھر اوپر سے ہجوم، وڈیو اور رننگ کمنٹری۔ وہاں موجود مردوں میں سے اگر یہ کسی کی اپنی ماں، بہن، بیٹیاں ہوتیں تو کیا پھر بھی وہ اسی طرح ہجوم بنا کر جمع ہوتا، وڈیو بناتا اور کمنٹری بھی کرتا؟ اگر خواتین نے کوئی غلط کام کیا تو بھی وہ اس سلوک کی مستحق نہ تھیں۔یہ ہمارے معاشرے کے اکثر مردوں کا وہ منافقانہ رویہ ہے جو اُن کی بے شرمی اور بے حیائی کو ظاہر کرتا ہے۔بازاروں میں، سڑک پر، پارک میں خواتین ایسے بے حیا مردوں کی نظروں اور حرکتوں سے اپنے آپ کو محفوظ نہیں سمجھتیں۔ اپنی کسی مجبوری میں گھر سے نکلنے والی خواتین پر آوازے کسے جاتے ہیں، اگر کوئی بیچاری سڑک پر پیدل چل رہی ہو یا اپنی کسی سواری کا انتظار کر رہی ہو اور چاہے حجاب میں ہی ہو، تو آپ کئی بار دیکھیں گے کہ کچھ گاڑیوں والے گزرتے ہوئے اُن کے پاس اپنی گاڑی آہستہ کریں گے، کچھ روک بھی لیں گے اور اُنہیں ساتھ بیٹھنے کی دعوت دیں گے۔ مردوں کی اس بے حیائی اور بے شرمی کو آپ تقریباً ہر جگہ اور ہر شعبہ ہائے زندگی میں دیکھ سکتے ہیں۔کیا کارپوریٹ دنیا اور مختلف بزنسز سے تعلق رکھنے والے وہ مرد بے شرم نہیں جو خواتین کو اپنے کاروبار بڑھانے، اپنی پروڈکٹس کو بیچنے حتیٰ کہ پبلک ریلیشنگ کے لیے استعمال کرتے ہیں۔ کیا وہ استاد بے شرم اور بے حیا نہیں جو اپنی خواتین اسٹوڈنٹس کو ہراساں کرتے ہیں اور یہ واقعات ہمارے ملک کے اعلیٰ تعلیمی اداروں میں روز بروز بڑھتے چلے جا رہے ہیں۔ بینکوں، انشورنس کمپنیوں اور کئی دوسرے کاروباری اداروں سے تعلق رکھنے والی خواتین کی یہ بھی شکایت سامنے آئی ہے کہ اُنہیں ایسے کام سونپے جاتے ہیں جس کا مقصد اُنہیں ایک شو پیس کے طور پر استعمال کرنا ہوتا ہے۔ ہماری فلموں، ڈراموں اشتہاروں میں خواتین کو نچوا کر، اُن سے آئٹم سانگ کروا کر، اُن سے فحش ڈانس اور دوسرے سین کرا کے پیسہ کمانے والے مرد کیا خود بے شرم اور بے حیا نہیں؟ میڈیا میں خواتین کے ’’بولڈ سین‘‘ چن چن کر دکھانے والوں میں حیا نام کی کوئی چیز ہے کہ وہ عورتوں کے اس استحصال میں کس ڈھٹائی سے حصہ دار بنے ہوئے ہیں۔ بے شرمی اور بے حیائی کا تعلق صرف عورت کے لباس اور اُس کی فحش انداز میں تشہیر سے نہیں بلکہ اس کا بہت بڑا تعلق مرد کے اپنے بے حیا ہونے سے ہے۔ہمارے دین میں حیا مرد اور عورت دونوں کے لیے لازم ہے۔ ہم عورت کی حیا پر تو بہت بات کرتے ہیں لیکن مردوں کی حیا پر بات نہیں ہوتی حالانکہ اکثر و بیشتر عورت کی بے حیائی میں دراصل بے حیا مرد کی سوچ اور اُس کے عمل کا بہت بڑا عمل دخل ہوتا ہے۔ اس سوچ کو بدلنے کے لیے ہمیں اپنے معاشرے کی کردار سازی کرنا ہو گی۔ اگر عورت کو پردہ اور حیا کی تعلیم دینی ہے تو مرد کو بھی سکھانا ہوگا کہ اُس کے لیے بھی حیا اُسی طرح لازم ہے جیسے کسی عورت کے لیے۔ عورت کو گھر سے نکلنے سے پہلے اگر یہ تعلیم دی جاتی ہے کہ وہ باپردہ ہو کر باہر نکلے تو مرد کو گھر سے باہر نکلنے والی خواتین کا احترام کرنا سکھائیں کہ وہ دوسروں کی مائوں، بہنوں کی اسی طرح عزت کرے جیسے وہ اپنی ماں بہن کے لیے دوسروں سے احترام چاہتا ہے۔ معاملہ کردار سازی کا ہے جس پر ہماری کوئی توجہ نہیں۔(کالم نگار کے نام کیساتھ ایس ایم ایس اور واٹس ایپ رائےدیں00923004647998)

مرد کی بے حیائی اور بے شرمی

پاکستان کے نامور شاعر انور مسعود کے بیٹے عمار مسعود کا گزشتہ روز اپنی والدہ محترمہ کی وفات پر جنگ میں شائع ہونے والا کالم ’’امی‘‘ پڑھا تو ایک بار پھر یہ یقین تازہ ہو گیا کہ مائیں واقعی سانجھی ہوتی ہے۔ میں عمار مسعود کے لکھے ہوئے الفاظ پڑھ رہا تھا لیکن میرے دل و دماغ پہ میری اپنی ماں کا نقش چھایا ہوا تھا۔ دل سے ایک آہ نکلی کہ کاش میری ماں زندہ ہوتیں اورمیرے پاس ہوتیں اور میں اُن سے اُسی طرح لاڈ پیار کر رہا ہوتا جو 2011ء میں اُن کی وفات تک میرا معمول تھا۔ رات کو سویا تو میری ماں میرے خواب میں آئیں۔ خواب بس اتنا سا تھا کہ میں نے اپنی ماں کو گلے لگایا ہوا تھا۔ آنکھ کھلی تو میں خوشی اور اطمینان کے احساس سے بھرپور تھا اور اُنہی احساسات کے ساتھ دوبارہ سو گیا۔ گھر میں سب سے چھوٹا ہونے کی وجہ سے مجھے میرے رب نے خوب موقع دیا کہ اپنے ماں باپ جب تک وہ زندہ رہے، سے پیار کا اظہار کروں۔ والد محترم تو 1981ء میں جب میں کوئی پندرہ سولہ سال کا تھا، فوت ہو گئے تھے لیکن اللہ نے کرم کیا اور ماں کا سایہ ہمارے سر پر 2011ء تک سلامت رکھا۔ جب تک ماں زندہ تھیں تو اکثر و بیشتر میرے والد میرے خواب میں آتے اور عموماً خواب یہی ہوتا کہ وہ زندہ ہو کر واپس ہمارے پاس آ گئے ہیں۔ اگرچہ خواب میں بھی میرے لیے یہ بات غیر یقینی ہوتی تھی لیکن میں بہت خوش ہوتا تھا۔ جب آنکھ کھلتی تو بہت دکھی ہوتا۔ ہر بار میرے ساتھ یہی ہوتا۔ جب سے میری ماں فوت ہوئی ہیںمیں نے شاید ہی کبھی اپنے والد کو خواب میں دیکھا ہو۔ ماں بھی خواب میں بہت کم نظر آتی ہیں، اس لیے عمار مسعود کا شکریہ جن کا کالم پڑھنے کے بعد میرے رب نے مجھے خواب میں ماں سے ملوا دیا اور وہ بھی ایسے کہ میں خوش ہو گیا۔ اللہ تعالیٰ عمار مسعود کی والدہ مرحومہ، میرے والدین اور ہر کلمہ گو کے والدین جو اُن سے بچھڑ چکے ہیں، کو جنت الفردوس میں جگہ عطا فرمائے، آمین! اور جن کے والدین زندہ ہیں اُنہیں اُن کی خدمت کے ساتھ ساتھ اُن سے خوب محبت کے اظہار کا موقع دے۔جو کچھ ماں باپ اپنے بچوں کے لیے کرتے ہیں اُس کا بدلہ دینا تو اولاد کے لیے ممکن ہی نہیں ہو سکتا لیکن جہاں بچوں کا فرض ہوتا ہے کہ اپنے ماں باپ کی خدمت کریں، اُن کا خیال رکھیں، اُن کی ضروریات کو پورا کریں وہاں والدین کے ساتھ محبت کا اظہار بھی بہت ضروری ہے۔ مجھے اس بات کی بہت خوشی ہے کہ میں نے اپنے ماں باپ کے ساتھ محبت کا خوب اظہار کیا، خصوصاً میری والدہ جن کے ساتھ رہنے کا مجھے اللہ نے کافی موقع دیا، اُن سے تو میں نے آخر دم تک خوب لاڈ پیار کیا۔ روزانہ اُن کے پاس دیر تک بیٹھتا، اُن کی ڈانٹ بھی کھاتا لیکن کبھی اُنہیں گلے لگاتا، کبھی پیار کرتا جو میرے لیے ایک سرمایہ سے کم نہیں۔میں نے ایک بار پہلے بھی اس بات کا اپنے کالم میں ذکر کیا تھا کہ اپنی بیماری کے آخری چند ماہ کے دوران میری والدہ میں ایک ایسی تبدیلی آئی جو میرے لیے تو اتنا بڑا تحفہ تھا کہ وہ میری زندگی کی بہت بڑی خوشی کا باعث ہے اور میں جب بھی اُسے یاد کرتا ہوں تو اپنے رب کا شکر ادا کرتا ہوں کہ میرے رب نے مجھ پر کتنا بڑا کرم کیا۔ میری ماں اپنے سب بچوں سے بے انتہا محبت کرتی تھیں اور سب بچے بھی‘ جب تک وہ زندہ رہیں اُن کی بہت خدمت کرتے رہے اور اُن سے پیار بھی کرتے رہے۔ مائیں اپنے اولاد سے ایک سی محبت کرتی ہیں لیکن چھوٹا ہونے کے ناتے میں زبردستی اپنی ماں سے لاڈ پیار کرتا بھی تھا اور کروا بھی لیتا تھا۔ اپنی زندگی کے آخری چند ہفتوں کے دوران میری ماں نجانے کیوں مجھے بار بار اپنے پاس بلاتیں اور کبھی مجھے ماتھے پر اور کبھی گال پر پیار کرتیں اور یہ دن میں کئی بار ہوتا۔ یہ صرف میرے ساتھ ہی ہوتا، وہ مجھے کہتیں بھی کہ تم مجھے سب سے اچھے لگتے ہو۔ میرے بہن بھائیوں نے میری ماں کی خدمت مجھ سے بہت زیادہ کی اور زندگی بھر ہماری ماں نے ساری اولاد کو ایک سی محبت دی لیکن کینسر کی بیماری نے اُن کے دماغ کو آخری ہفتوں میں کچھ اس طرح متاثر کیا کہ میرے لیے میری ماں کی محبت بہت جاگ اٹھی اور وہ مجھے بار بار پیار کرنے لگیں۔ جب میں یہ سوچتا ہوں تو مجھے ایک ایسی خوشی کا احساس ہوتا ہے جسے الفاظ میں بیان کرنا ممکن نہیں۔مجھے وہ لوگ اچھے نہیں لگتے جو اپنے ماں باپ کے حق میں اچھے نہیں ہوتے۔ کوئی ویسے کیسا بھی ہو لیکن جب مجھے یہ پتا چل جائے کہ وہ اپنے ماں باپ کے ساتھ بہت اچھا ہے اور اُن کی خدمت کرتا ہے تو مجھے وہ اچھا لگنے لگتا ہے۔ جن کے والدین زندہ ہیں میری اُن سے گزارش ہے کہ اُن کی خوب خدمت کریں، اُن سے پیار کا اظہار بھی کریں اور چاہے والدین ڈانٹیں بھی اکیلے میں یا دوسروں کے سامنے‘ اس پر ذرہ برابر بھی بُرا نہ منائیں بلکہ ہنسی سے اپنے ماں باپ کی ڈانٹ کو ویلکم کریں۔ اور مجھ جیسے جن کے والدین اس دنیا سے رخصت ہو گئے ہیں، اُن کے لیے میری دعا ہے کہ اللہ ہمیں اپنے والدین کے لیے صدقہ جاریہ بننے کی توفیق عطا فرمائے، آمین!(کالم نگار کے نام کیساتھ ایس ایم ایس اور واٹس ایپ رائےدیں00923004647998)

مائیں واقعی سانجھی ہوتی ہیں!

Day of shame; Sialkot incident | Ansar Abbasi | AAVIEWS |

To confirm Justice Rana Shamim’s affidavit: UK oath commissioner ready to appear before Pak courts |

2023 election via EVM not possible; Danger of serious fight between ECP, govt |Ansar Abbasi |AAVIEWS

ARY confirms Ansar’s affidavit story; Geo’s Shahzaib & HUM’s Meher Qs & Abbasis answers| AnsarAbbasi

My Affidavit is in Lock'n'Key, how it reached media? RanaShameem Q in Court|What Ansar Abbasi says?

Who records phone calls? CJIHC questioned; Gen Afzal rebuts audit report on NDMA | Ansar Abbasi |

Malik Riaz- the most influential person in Pakistan | Ansar Abbasi | AAVIEWS |

PMLN’s spin on Maryiam Nawaz’s audio leak; Would she tender an apology?? | Ansar Abbasi | AAVIEWS |

Rs40b irregularities detected in PM’s Covid package; Report Public on IMF direction| Ansar Abbasi |

Elite’s property secured, ordinary citizens’ demolished. UmarCheema on SC’s contradictions | AAVIEWS

Imran Khan Govt is out of woods; Establishment neutral, opposition incompetent | Ansar Abbasi |

Ex DGISI is now Maryium Nawaz’s sole target; Also talks -ively about “few” judges | Ansar Abbasi |

What Ahmad Noorani says in his defense about audio leak? Govt’s view | Ansar Abbasi | AAVIEWS |

Saqib Nisar audio controversy deepens; 100 TTP men released by govt | Ansar Abbasi | AAVIEWS |

SAMAA story makes Saqib Nisar’s audio doubtful. Noorani stands by his story | Ansar Abbasi | AAVIEWS

After audio leak, Now video leak against Saqib Nisar will surface | Ansar Abbasi | AAVIEWS |

Nawaz speech- a rejoinder to Chief Justice’s address to Asma Jehangir Conference | Ansar Abbasi |

Why Pakistani judiciary has been assessed 126th out of 130 in the world? | Ansar Abbasi | AAVIEWS |

Kurd raises serious Qs reg judiciary role, CJP defends, says JJs have no pressure | Ansar Abbasi |

Will new DGISI depoliticize the institution? What a senior Estb source had told me? | Ansar Abbasi |

Meher Bukhari’s tough questioning to Ansar Abbasi on Hum TV about affidavit story | Ansar Abbasi |

From intrigues within judiciary to a reference against Saqib Nisar | Ansar Abbasi | AAVIEWS| AAVIEWS

What Ansar Abbasi said before CJIHC in the contempt case today | Ansar Abbasi| AAVIEWS | Exclusive |

What Ansar Abbasi said before CJIHC in the contempt case today | Ansar Abbasi | EXCLUSIVE | AAVIEWS

ExCJ GB says Saqib Nisar directed to keep Nawaz, Maryam in jail till 2018 polls | EXCLUSIVE| AAVIEWS

Ishaq Dar’s interview on Pak economy. What went wrong and how to improve it? | Ansar Abbasi |AAVIEWS

IK govt reaches the danger zone- both politically and economically | Ansar Abbasi | AAVIEWS

Miftah Ismail’s exclusive talk on LNG ‘s past, present and future | Ansar Abbasi | AAVIEWS |

Alarm bells started ringing 4 Imran Khan govt; It’s all coincidental or orchestrated?| Ansar Abbasi

How fed gov harassed & humiliated poor locals to please PM’s cousin? Interesting Story | AAVIEWS

How Sugar mafia threatened PM Imran Khan? Mafia defeated govt, Shahzad Akbar missing | Ansar Abbasi

The story of  Ishaq Dar’s persecution: How NAB, WhatsApp JIT defrauded courts | Ansar Abbasi |

BIG STORY- Govt reaches understanding with TTP for temporary truce | Ansar Abbasi | AAVIEWS

Where did the NAB’s over Rs 800 billion disappear? Finance Ministry exposes NAB | Ansar Abbasi |

NAB chairman becomes Prime Minister’s slave | Ansar Abbasi | AAVIEWS

Why G Bajwa being praised for Govt-TLP deal? PM supports the deal | Ansar Abbasi |

A minister, who played double game with PM. IK keeps an eye on all through IB | Ansar Abbasi |

PMLN’s candidate for PM- Maryiam or Shahbaz! Confusions & background contacts | EXCLUSIVE | AAVIEWS

PM intervenes into Shoaib Akhtar case; No more 2 two plots for judges, baboos | Ansar Abbasi|AAVIEWS

Peaceful solution in TLP issue still possible; How, where Muftis could help Imran Khan?Ansar Abbasi

New audio leak- mischief or a conspiracy: Nation supports Shoaib Akhtar | Ansar Abbasi | AAVIEWS |

Ansar Abbasi Story about DGISI interview Proven True | Muneeb Farooq Demands apology frm Fawad Ch |

Gen Nadeem new DGISI appointed: Bad precedent of interviewing officers set | Ansar Abbasi | AAVIEWS

Gen Retd Bilal Akbar’s name making rounds for “key” posts/ DGISI DGNAB | Ansar Abbasi | AAVIEWS |

New “feather” in Imran Khan’s hat- breaks 70 years old price hike record | Ansar Abbasi | AAVIEWS |

PM issued directions to concerned depts to check growing obscenity | Ansar Abbasi |

Delay in notification- PM own decision. Shahbaz upset over slogans against Gen Faiz | Ansar Abbasi |

Ansar Abbasi

Ansar Abbasi Latest Talk Shows and Vlogs Videos

Rana Shamim knows implications of his affidavit, can even go to jail; says son | Ansar Abbasi |

Ansar Abbasi Latest Talk Shows and Vlogs Videos

Columns