امید کے دھاگے سے بندھا تحریک انصاف کا کارکن خود کو مایوسی کا شکار ہونے سے بچانے کے لیے مثبت پہلوئوں کی تلاش میں لگا رہتا ہے ۔ مباحثوں کی نشست میں کچھ دلائل دہرا دہرا کے دیے جاتے ہیں ۔ مثلا کہا جاتا ہے کہ عمران خان ماضی کے حکمرانوں کی طرح کرپٹ نہیں ہیں، بتایا جاتا ہے کہ تیس سال کی خرابیاں دور کرنے میں کچھ وقت تو لگتا ہے ، دلیل دی جاتی ہے کہ عمران خان پانچ نہیں اگلے بیس سال کا منصوبہ بنا کر کام کر رہے ہیں، یہ بھی کہا جاتا ہے کہ مافیاز نے عمران خان کو گھیر رکھا ہے ان سے جان چھڑانے میں وقت تو لگے گااور یہ بھی کہ عمران خان کو ماضی کے حکمرانوں کے قرضے واپس کرنے پڑ رہے ہیں جس کی وجہ سے معیشت پہ دبائو ہے ۔ کچھ لوگوں کا خیال ہے کہ ایسے دلائل دینے والے خود فریبی کا شکار ہیں، مگر میں تھوڑا سا مارجن دیتے ہوئے یہ کہوں گا کہ یہ لوگ مایوس اور نا امید ہونے میں جلدی نہیں کر رہے اوراپنی حکومت کو ایک اور موقع دینا چاہتے ہیں ۔
دوسری طرف وہ کارکن جنہوں نے مایوس ہونے میں جلدی کی ان کے پاس اپنے دلائل ہیں۔ ان کا خیال ہے کہ تحریک انصاف کو معمول کی حکومت کرنے کے لیے منتخب نہیں کیا گیا تھا بلکہ عمران خان کو ریفارمز یا تبدیلی لانے کے لیے وزیر اعظم بنایا گیا تھا۔ پولیس کا شعبہ اس میں سر فہرست تھا کیونکہ عوام کو خیبر پختونخواہ کا پولیس ماڈل دکھا کر تبدیلی کا وعدہ کیا گیا تھا۔ دوسرا شعبہ صحت اور تعلیم کا تھا ، اس کے لیے بھی خیبر پختونخواہ میں لائی جانے والی تبدیلی کی تصویر دکھائی گئی تھی۔ مایوس ہو جانے والوں کا خیال ہے کہ دو سال کے دوران ان تینوں شعبوں میں اصلاحات لانے کے لیے کوئی عملی قدم نہ اٹھایا گیا اور یہ شعبے معمول کے مطابق چل رہے ہیں۔ پولیس میں رشوت کا نظام آج بھی جوں کا توں ہے بلکہ رشوت کے ریٹس مہنگائی کے تناسب سے بڑھ گئے ہیں ۔سرکاری تعلیمی اداروں میں آج بھی کوئی اپنے بچوں کو پڑھانے کو تیار نہیںجبکہ صحت پرائیویٹ ہسپتالوں سے خریدنی پڑتی ہے ۔ ایف بی آر کا نظام جوں کا توں ہے ، کسی کی فائل کھل جائے تو قانونی تقاضے پورے رکھنے والے شخص کی زندگی بھی اجیرن بنا دی جاتی ہے ، ایک چھوٹا کاروباری بھی پچاس ہزار روپے دے کر ہی جان چھڑانے میں عافیت سمجھتا ہے ۔ الیکشن کیمپین کے دوران اپنے ٹی وی پرواگرام کے لئے میں نے داروغہ والا لاہور کے رہائشیوں سے پوچھا کہ وہ عمران خان کو ووٹ کیوں دے رہے ہیں تو کہنے لگے کہ اس علاقے کا سب سے بڑا مسئلہ آلودگی ہے یہاں بے شمار فیکٹریاں ہیں جہاں ٹائر جلائے جاتے ہیں فضا ہر وقت آلودہ رہتی ہے، گھر کی دیواروں ،پردوں اور صوفوں تک پہ کالک جمی رہتی ہے ، بچے اور بزرگ سانس اور پھیپھڑوں کی بیماری میں مبتلا ہو گئے ہیں ۔ ان کا خیال تھا کہ عمران خان آئیں گے تو فیکٹری مالکان رشوت دے کر ٹائر نہیں جلا سکیں گے۔ اب جا کر پوچھا تو پتہ چلا ہے کہ ماحولیات والوں نے اپنے ریٹس بڑھا دیے ہیں، دن کی بجائے رات میں ٹائر جلا لیے جاتے ہیں تاکہ دھواں رات کی تاریکی کا حصہ بن جائے مگر حالات جوں کے توں ہیں۔
بہت سے لوگوں کو امید تھی کہ عمران خان آئیں گے تو کھیلوں کا معیار بلند ہو جائے گا، کرکٹ میں تو میرٹ آئے گا ہی ، دیگر کھیلوں میں بھی اصلاحات لائی جائیں گی اور اسپورٹس بورڈ بھی متحرک ہو کر عالمی کھیلوں میں رنگ دکھانے لگے گا۔ مگر مایوس ہو جانے والوں کا خیال ہے کہ باقی کھیلوں کو تو چھوڑیے کرکٹ میں بھی اصلاحات نہ لائی جا سکیں اور حالات ویسے کے ویسے ہی ہیں۔
معاشی میدان میں تباہی مچی ہے ، گروتھ ریٹ پانچ سے گر کر منفی میں چلا گیا ، واضح رہے کہ کورونا پر اس کی ذمہ داری بہت کم عائد ہوتی ہے ۔ دو سال میں ریکارڈ نوٹ چھاپے گئے ہیں اور قرضوں میں ریکارڈ اضافہ ہوا ہے ۔
جس وقت یہ تحریر لکھی جا رہی ہے دو سالہ کارکردگی بتانے کے لیے وفاقی وزراء کی ایک پریس کانفرنس جاری ہے جس میں ویسی ہی باتیں کی جار ہی ہیں جیسی ماضی میں ہوتی تھیں ۔ عمر ایوب صاحب فرما رہے ہیں کہ دس لاکھ نوکریاں پیدا کررہے ہیں ، سرکلر ڈیٹ کو ختم کر دیں گے۔شبلی فراز نے فرمایا ہے کہ خوشحالی کا دور شروع ہو نے والا ہے ۔ فہمیدہ مرزا بتا رہی ہیں کہ سپورٹس بورڈ میں اصلاحات لا رہے ہیں ۔ شیریں مزاری نے فرمایا پچھلی حکومتوں نے انسانی حقوق پہ کوئی کام نہیں کیا لیکن ہماری منسٹری بہت اچھی چل رہی ہے۔ فواد چودھری بتا رہے ہیں کہ حکومت کی دو سالہ کارکردگی کافی زبردست رہی ، ہم نے امپورٹ اکانومی کو ایکسپورٹ اکانومی میں تبدیل کیا۔آپ جملوں پہ غورکیجئے۔ ’’کر رہے ہیں‘‘ ، ’’ہو رہا ہے ‘‘، ’’ اصلاحات لا رہے ہیں ‘‘، ’’ پلاننگ کر رہے ہیں‘‘ ۔مستقبل کے صیغوں سے تراشے ایسے جملے ہم ماضی میں بھی سنتے آئے ہیں اب بھی سن رہے ہیں۔ فرق کچھ بھی نہیں ۔
فواد چودھری نے کچھ دن پہلے ایک انٹرویو میں بالکل صحیح کہا تھا کہ عوام نے تحریک انصاف کو معمول کے نٹ بولٹ ٹھیک کر نے کے لیے منتخب نہیں کیا بلکہ تبدیلی لانے کے لیے منتخب کیا ہے ۔ اگر تبدیلی نہیں آ رہی تو معمول کی گورننس کو کامیابی قرار نہیں دیا جا سکے گا۔
پریشانی کی بات یہ نہیں ہے کہ حکومت مختلف اداروں میں اصلاحات نہیں لا پائی، پریشانی کی بات تو یہ ہے کہ اصلاحات کے عمل کا آغاز تک نہیں ہوا ہے ۔ پریشانی کی بات یہ ہے کہ تبدیلی کے منصوبے زیر غور نہیں ہیں۔ مثال کے طورپر پولیس ہی کو لیجئے ، تبدیلی تو نہیں آئی چلیں کوئی بات نہیں ، لیکن کیا کوئی ایسا منصوبہ زیر غور ہے جس سے اگلے تین سال میں پولیس کا نظام ٹھیک ہو جائے اور رشوت کے بغیر تھانے میں میرٹ پر انصاف ملنے لگے۔ اگر ایسا ہے تو تحریک انصاف کی حکومت کامیاب ہے ورنہ یقینا تشویش کی بات ہے۔



دو سالہ کارکردگی کا جائزہ

پچھلے گیارہ مہینے میںگیارہ سو ارب یعنی 1.1 کھرب کے ریکارڈ نوٹ چھاپے گئے ہیں۔ اس سے پہلے پاکستان کی تاریخ میں ایک سال کی مدت میں چھاپے جانے والے زیادہ سے زیادہ نوٹ 777 ملین کے تھے جو اسحاق ڈار صاحب کے زمانے میں 2016-17 میں چھاپے گئے تھے۔ نوٹ چھاپنے سے کیا ہوتا ہے اس کا اندازہ آپ اس بات سے لگائیں کہ اگر 490 ارب روپے کے نوٹ چھاپے جائیں تو افراط زر یعنی مہنگائی کی شرح ایک فیصد تک بڑھ جاتی ہے ۔ اب پچھلے ایک سال میں مہنگائی کتنی بڑھی ہے اس کا اندازہ آپ کیلکیولیٹر کے ذریعے لگا سکتے ہیں۔
اس حکومت کے21ماہ کے دور میں اب تک 15 ارب ڈالر کے قرضے بڑھے ہیں جو کہ 8.5 ارب ڈالر سالانہ بنتے ہیں ۔اس سے پہلے کے دس سال میں بیرونی قرضے 4.5 ارب ڈالر سالانہ کے حساب سے بڑھے تھے۔ گویا پچھلے دو سال میں پاکستان میں سالانہ بڑھنے والے قرضے دس سال میں بڑھنے والے قرضوں کا دو گنا ہو گئے ہیں ۔ دلچسپ بات یہ کہ پاکستان کی آزادی سے لیکر 30 جون 2011 تک پاکستان کے مجموعی قرضے 12 ہزار 500 ارب روپے تھے جبکہ نئی حکومت کے پہلے 21 ماہ میں حکومت کے قرضے 12 ہزار 900 ارب روپے ہیں ۔ یعنی آزادی کے پہلے 64 سال کے قرضوں کے مقابلے میں موجودہ حکومت کے 21 ماہ کے قرضوں کی رقم زیادہ ہے ۔
اب ان قرضوں کا ایک جواب حکومت کی طرف سے یہ دیا گیا کہ ماضی کی حکومتوں کی جانب سے لیے گئے قرضے اتارنے کے لیے مزید قرضے لینا پڑے ہیں۔ یہ بات درست ہوتی تو حساب کتاب آسان ہو جاتا ۔ یعنی حکومت نئے قرضے لیتی اور انہیں پرانے قرضوں کی قسطوں کی مد میں ادا کر دیتی یوں پاکستان کے مجموعی قرضے اتنے کے اتنے ہی رہتے ۔ لیکن جب ہم یہ کہتے ہیں کہ قرضے بڑھے ہیں تو ’’بڑھنے ‘‘کا مطلب یہ ہے کہ حکومت نے اگر ہزار ارب کے قرضے لیے تو 400 ارب کی قسطیں ادا کر دیں اور 600 ارب جیب میں ڈال لیے ۔ جس سے قرضے بڑھ گئے ۔اس لیے یہ کہنا صریحا غلط ہے کہ قرضے اتارنے کے لیے قرضے لیے گئے ۔اگر ایسا ہوتا تو مجموعی قرضے تقریبا اتنے ہی رہتے جتنے اس حکومت کو ورثے میں ملے تھے۔ اس میں اضافہ صرف اس سود کی رقم کا ہونا چاہیے تھا جو نئے قرضوں پر ادا کرنی ہے ۔
اب آئیے لوٹ مار کی سادہ اور چھوٹی سے کہانی پر۔ پچھلے چوبیس سال میں بینکوں کے ذریعے 160 ارب ڈالر ملک سے قانونی طریقے سے باہر گئے ۔ ہوا یوں کہ جس کے پاس بھی جائز یا ناجائز کمائی کے روپے موجود تھے اس نے اوپن مارکیٹ سے تھوڑے تھوڑے کر کے ڈالرز خریدے ، بینک میں ایک فارن کرنسی اکائونٹ کھلوایا ، ڈالرز اس اکائونٹ میں رکھے اور دوسرے ملک سے جا کر نکلوا لیے ۔ یوںپاکستان کا کل قرضہ تو ہے 110 ارب ڈالر لیکن اس سے زیادہ 160 ارب ڈالر اس کالے قانون کے ذریعے ملک سے باہر چلے گئے جسے کرپٹ سیاستدانوں نے اسی مقصد کے لیے بنایا گیا تھا۔واضح رہے کہ غیر قانونی طریقے سے ملک سے باہر جانے والے 150ارب ڈالر اس کے علاوہ ہیں ، جو کسی ایان علی کے ذریعے ،لانچوں کے ذریعے ، حوالہ ہنڈی کے ذریعے یا کسی اور طریقے سے باہر گئے ۔ یعنی مجموعی طور پر300 ارب ڈالر اس ملک سے لوٹ مار کے ذریعے باہر بھجوا دیے گئے اور ہم 110 ارب ڈالر کے قرضے کو بیٹھے رو رہے ہیں۔
بچپن سے سنتے آ رہے ہیں کہ یہ آئی ایم ایف کا بجٹ ہے ۔ تحریک انصاف کی حکومت سے توقع تھی کہ ملک کو غلامی سے نکالے گی۔ لیکن صورتحال یہ ہے کہ آئی ایم ایف نے پچھلے سال حکومت کو پابند کیا کہ عوام سے 5500ارب روپے کے ٹیکس اکٹھے کرے ۔ حکومت پہلے تو ناچاہتے ہوئے مان گئی لیکن کچھ ماہ بعد اس پر نظر ثانی کی درخواست کی تو 300 ارب کی چھوٹ مل گئی ۔طے ہوا 5200 ارب کا ٹیکس اکٹھا کیا جائے گا۔ حکومت نے نئے ٹیکسز لگائے ، شبر زیدی صاحب نے ٹیکس ریفارمز متعارف کرائے، کاروباری حضرات سے جھگڑا کیا، انہیں کبھی پیار سے اور کبھی غصے سے سمجھایا، کبھی خود سمجھایا اور کبھی ریاست کی دوسری طاقت ور شخصیات کا سہارا لیا ۔ نتیجہ یہ نکلا کہ کل ملا کر 3900 سو ارب کا ٹیکس اکٹھا ہو پایا ۔1300 ارب کا شارٹ فال۔ بہانہ بنا کورونا کا ،کہا گیا کورونا بحران کی وجہ سے ٹیکس پورا اکٹھانہیں ہو پایا۔ ماہرین معاشیات جانتے ہیں کہ اگر کورونا نہ آتا تو بھی ٹیکس 4200 ارب روپے سے زیادہ اکٹھا نہیں ہو پا رہا تھایعنی ایک ہزار ارب کا شارٹ فال پھر بھی تھا، کورونا تو رواں مالی سال کے آخری تین ماہ میں آیا ۔ لہذا عوام اور خود کو دھوکہ دینے سے کچھ حاصل نہیں ہو گا۔ اب آئی ایم کی فرمائش ہے کہ اگلے سال 5100ارب روپیہ ٹیکس جمع کریں جبکہ ایف بی آر کا خیال ہے کہ 4400ارب روپے سے زیادہ اکٹھے نہیں کیے جا سکتے ۔
مجھے وزیر اعظم عمران خان صاحب کے نعرے یار آ رہے ہیں۔ وہ کہا کرتے تھے میں اس قوم سے 8 ہزار ارب روپیہ ٹیکس اکٹھا کر کے دکھائوں گا۔ وہ کہا کرتے تھے کہ لوگ اس لیے ٹیکس نہیں دیتے کہ وہ کرپٹ سیاستدانوں پر اعتماد نہیں کرتے ۔ وہ کہا کرتے تھے کہ قرضے لینے سے ملک ترقی نہیں کر سکتا ۔ وہ کہا کرتے تھے کہ آئی ایم ایف کے پاس جانے سے بہتر تو خودکشی کرنا ہے ۔ وہ کہا کرتے تھے کہ ٹیکس چوری کو روکنے کے لیے ٹیکس ریفارمز لائوں گا۔ وہ کہا کرتے تھے کہ کرپٹ لوگوں سے پیسے نکلوا کر ملک کے قرضے اتاروں گا۔ وہ کہا کرتے تھے دوسرے ملکوں سے لوگ پاکستان میں نوکریاں کرنے آیا کریں گے۔ بیمار معیشت کو وزیر اعظم کے وعدے پورے ہونے کا انتظار ہے ۔



کیا کورونا نے معیشت کو بیمار کیا؟

لودھراں سے دوستوں نے تربوز کی فصل کی تصویریں بھیجی ہیںجہاں جھاڑویوں کے بیچوں بیچ آدھے تیار ہوئے تربوز لا وارث پڑے ہیں ، پورے جنوبی پنجاب میں آم کی فصل شدید متاثر ہے ، درختوں سے پتے غائب ہیں صرف جھاڑیاں بچی ہیں یا کچے آم کے بچے جو اَب بڑے نہیں ہوںگے۔بھکر میں چنے کی فصل کابرا حال بھی دیکھنے کو ملا ہے۔بیشتر جگہوں پر چارے کی فصل یوں تباہ ہو چکی ہے جیسے تھی ہی نہیں۔ کپاس کی فصل کسانوں کے لیے ڈرائونا خواب ثابت ہوئی ہے ۔خوف کا یہ عالم ہے کہ ساہیوال سے ٹڈی دل کے گزرنے کی اطلاع ملے تو اوکاڑہ اور دیپالپورمیں کسانوں کی نیند اُڑ جاتی ہے ۔رحیم یار خان سے گزرتی ہے تو ڈیرہ غازی خان میں کپاس کے کاشتکار دعائیں پڑھنے لگتے ہیں۔ٹڈی دل نے 65 فیصد پاکستانیوں کی نیند حرام کر رکھی ہے ۔ کسانوںپر خوف کا عالم ہے ، سال بھر کی کمائی ٹڈیوں کے رحم و کرم پر ہے ، تدارک میں دیر ہو چکی۔ وہ جو پہلے کرنا تھا وہ ہوا نہیں، جو اَب کیا جا رہا ہے ،بے اثر ہے۔
میں نے 23جنوری کے اپنے کالم میں لکھا تھا کہ ٹڈیوں کے دل نے صحرائوں کی ریت میں انڈے دے دیے ہیں۔کسانوں کی پریشانی کو بھانپتے ہوئے یہ بھی لکھا تھا اگر ان انڈوں کو بروقت تلف نہ کیا گیا تو چند ماہ میں نئی اور توانا فوج تیار ہو جائے گی۔ یہ فوج موجودہ فوج سے 50 سے 80 گنا زیادہ ہو سکتی ہے کیونکہ ایک ایک ٹڈی سو سو انڈے دینے کی صلاحیت رکھتی ہے۔ عرض کیا تھا کہ ہنگامی بنیادوں پر ٹڈی کے تدارک کے لیے اقدامات کرنے کی ضرورت ہے ورنہ فوڈ سیکیورٹی کے ساتھ ساتھ معیشت پر بھی اس کے سنگین اثرات مرتب ہو سکتے ہیں۔ تب اس مسئلے کو سنجیدگی سے نہ لیا گیا اور پھر فروری میں کورونا کے آنے کے بعد توخاموشی سے تیار ہونے والی ٹڈی کی نئی نسل بالکل نظر انداز ہو گئی ۔ اب یہ نئی نسل پاکستان کی فضائوں میں آفت بن کر موجود ہے۔ جہاں سے گزرتی ہے یوں تباہی مچاتی ہے کہ کیا ہلاکو خان کی فوج مچاتی ہو گی۔ٹُنڈ مُنڈ سی جھاڑیاں باقی بچتی ہیں اور پتے غائب۔ پتے نہیں بچیں گے تو کیا خاک پھل لگے گا۔
ٹڈی دل کی اس آفت سے پاکستان کی معیشت کو 600 ارب روپے کے نقصان کا خدشہ پیدا ہو گیا ہے ۔ زراعت جو جی ڈی پی کا 19 فیصد ہے ، شدید متاثر ہونے کا امکان ہے جس سے مجموعی جی ڈی پی پر شدید برا اثر پڑے گا ۔ تحریک انصاف کی حکومت پر یوں بھی بہت دبائو ہے کہ وہ اسحق ڈار کی چھوڑی ہوئی جی ڈی پی کو برقرار نہ رکھ سکی ۔ نہ صرف برقرار نہ رکھ سکی بلکہ اسے اس کے تقریبا نصف تک لے آئی ۔یقینا حکومت جانتی ہے کہ ہماری تقریبا 65 فیصدآبادی بالواسطہ یا بلا واسطہ زراعت سے وابستہ ہے ، ٹڈی دل کے حملوں سے خراب ہونے والی فصل کا اثر صرف کسان پر نہیں پڑے گا۔ وہ مزدور جو دیہاڑی پر کھیتوں میں کام کرتے ہیں، وہ سیلز مین جو کھاد اور ادویا بیچتے ہیں۔ وہ چھوٹا ٹرانسپورٹر جو فصلوں کا پھل منڈیوں تک لے جاتا ہے، وہ آڑھتی جو کسان اور دکاندار کے درمیان کام کرتا ہے ، پھر وہ منڈیوں میں کام کرنے والا مزدور، گھریلو صارف، سب کے سب ٹڈی دل کی تباہی سے متاثر ہونا شروع ہو چکے ہیں۔
لودھراں ، جلال پور پیروالا، وہاڑی، رحیم یار خان، ڈیرہ غازی خان، تھرپارکراور اندرون سندھ کے بہت سے اضلاع ٹڈی کے حملے کا نشانہ بن چکے ہیں۔ جس سے کپاس ، دھان، مکئی،آم، چنے ، دالیں اور چارے کی فصلیں تباہ ہو چکی ہیں۔ ان علاقوں میں آپ چلے جائیں تو لگتا ہے کوئی آفت گزر چکی ہے ، کورونا سے بھی زیادہ خوفناک، زلزلے اور سیلاب سے بھی زیادہ تباہ کن۔ کسانوں اور ان سے جڑے مزدوروں کے چہرے یوں لٹکے ہیں کہ مرگ کا سماں ہے ۔ ٹڈی دل کے ساتھ ساتھ اس بات سے بھی پریشان ہیں کہ ہمارے منتخب نمائندوں نے ہمارے لیے آواز اٹھائی ، حالات کی سنگینی کا بروقت ادراک کیا، نہ ہی حکومت اور محکمہ زراعت کو ہوش دلایا۔ خسرو بختار، زرتاج گل، طارق بشیر چیمہ، میاں شفیق آرائیں اور کتنے ہی منتخب نمائندوں سے لوگوں ناراض نظر آتے ہیں۔ خود وزیراعلی پنجاب کا تعلق جنوبی پنجاب سے ہے جہاں سب سے زیادہ تباہی ہوئی ہے لیکن فکر مندی کے آثار دکھائی نہیں دیے۔
سپرے ہو رہا ہے لیکن اب اس کا اثر نہیں ہو رہا۔ ٹڈی دل دن میں سفر کرتا اور رات میں بیٹھتا ہے، دس منٹ میں فصل سمیٹ لیتا ہے۔ جہاں یہ بیٹھتا ہے وہاں سپرے کیا جاتا ہے ، جو دس فیصد سے زیادہ ٹڈی کو مارنے میں کامیاب نہیں ہو پاتااور ٹڈی دوسری جگہ کے لیے اڑان بھر لیتی ہے۔ یہاں ایک اور مسئلہ بھی درپیش ہے ،یہ تو ظاہر ہے کہ ٹڈی کے قیام کا پہلے سے علم نہیں ہوتا ، جہاں یہ بیٹھنے کا ارادہ کر لے وہاں کے لیے ٹیمیں روانہ کی جاتی ہیں ، جب تک ٹیمیں وہاں پہنچتی ہیں فصل کا صفایا ہو چکا ہوتا ہے۔
اس ساری صورتحال سے پریشان کسانوں کے پاس ایک ہی حل بچتا ہے کہ وہ محکمہ زراعت سے رابطہ کریںاور جب وہ ایسا کرتے ہیں تو انہیں کے زخموں پر مزید نمک چھڑکا جاتا ہے۔ جواب ملتا ہے کہ ہمارے پاس اس ٹڈی کا کوئی حل نہیں ، ایک ہی حل ہے کہ ٹڈی کو فصل پر بیٹھنے نہ دیا جائے ۔محکمہ زراعت کے ماہرین کسانوں کو مشورہ دیتے ہیں جب ٹڈی آپ کی فصل کی طرف بڑھے تو زور زور سے ڈھول بجائیں، گھر سے برتن لے آئیں انہیں آپس میں ٹکرا کرشور پیدا کریں اور ٹڈی کو اپنی فصل پر بیٹھنے نہ دیں۔
اگر یہی ایک حل بچا ہے تو حکومت کو چاہیے کہ محکمہ زراعت والوں کو ایک ایک ڈھول لے کر دے دیں ، اپنے ایم این ایز اور ایم پی ایز کے گلے میں بھی ایک ایک ڈھول لٹکا دیں ، جسے یہ سب کھیتوں میں کھڑے ہو کر بچاتے رہیں ، ورنہ ایسا نہ ہو کہ اگلے انتخابات میں عوام انہی کا ڈھول بجا دیں۔



ڈھول بجائیں ، فصل بچائیں

کیا وزارت اطلاعات میںتبدیلی سے حکومت اور میڈیا کے تعلقات بہتر ہو جائیں گے؟کیا یہ تبدیلیاں واقعی تعلقات کو بہتر کرنے کے لیے کی گئی ہیں؟ کیا فردوس عاشق اعوان پر بڑا اعتراض یہ تھا کہ وہ میڈیا اور حکومت کو قریب نہ لا سکیں؟ان تینوں سوالو ں کے جواب مل جائیں گے اگریہ معلوم ہو جائے کہ کیاوزیر اعظم عمران خان کو میڈیا سے تعلقات بہتر کرنے میں دلچسپی بھی ہے؟
حال ہی میں وزیراعظم نے سوشل میڈیا کے نمائندوں اور یو ٹیوبرز کے ساتھ دو ملاقاتیں کیں اور تیسری ملاقات مئی کے پہلے ہفتے میں ہونے جا رہی ہے ۔ پہلی دونوں ملاقاتوں کے شرکاء طویل سیشن کے بعد اس نتیجے پر پہنچے کہ وزیر اعظم اس بات کے قائل ہو چکے ہیں کہ مین سٹریم میڈیا بے وقعت ہو چکا ہے ، میڈیا ایجنڈے پر چلتا ہے، میڈیا اپنی اہمیت کھو چکا ہے ، اینکرز کی ساکھ خراب ہو چکی ہے ،انہیں کوئی دیکھنا پسند نہیں کرتا ، اس میڈیا کا کوئی مستقبل نہیںاور یہ کہ آنے والا دور ڈیجیٹل میڈیا کا ہے۔ سوشل میڈیا کے نمائندوں کا یہ مشاہدہ اس لیے درست معلوم ہوتا ہے کہ وزیر اعظم نے پچھلے کچھ عرصے میں یو ٹیوبرز سے ملاقات کو نہ صرف خصوصی اہمیت دی بلکہ اپنے کچھ وعدوں سے غیر اعلانیہ طور پر اسے مین سٹریم میڈیا کے برابر کھڑا کرنے کاارادہ بھی ظاہر کیا۔ ڈیجیٹل میڈیا کو اشتہارات دینے اور انہیں پی آئی ڈی کی جانب سے پریس کارڈ جاری کرنے جیسے اقدامات پر غور سے بھی یہی لگتا ہے کہ وزیر اعظم ڈیجیٹل میڈیا کو مین سٹریم میڈیا کے متوازی کھڑا کرنے کا سوچ رہے ہیں۔ایسے میں مین سٹریم میڈیا کے ساتھ تعلقات کی بہتری حکومت کی ترجیح معلوم نہیں ہوتی۔اب سوال یہ پیدا ہوتا ہے کہ میڈیا سے خوشگوارتعلقات اگر حکومت کی ترجیح ہے ہی نہیں تو وزارت اطلاعات میں اہم تبدیلیاں کیوں کی گئی ہیں۔
شبلی فراز کے بارے میری رائے تعریفوں کے پُل باندھنے اور انہیں معتدل مزاج قرار دے کر میڈیا کے ساتھ تعلقات کی بہتری کی امید لگانے والوں سے مختلف ہے ۔ نہ تو وہ بہت شریں زبان ہیں نہ بہت ملنسار۔ اس کے برعکس وہ ذود رنج بھی ہیں اور جارح مزاج بھی۔ اس سے بھی بڑھ کر یہ کہ ان کی پالیسی وزیر اعظم سے مختلف کیسے ہو سکتی ہے ۔جب وزیر اعظم کا ذہن میڈیا کے حوالے سے بہت واضح ہے تو شبلی فراز کے اہداف مختلف کیسے ہو سکتے ہیں ؟مختصر یہ کہ شبلی فراز سے زیادہ توقعات وابستہ کرنا محض خام خیالی ہو گی کہ اصل پالیسی تو وزیر اعظم کی ہے ۔
سوشل میڈیا کے ہاتھ مضبوط کرنے کے لیے ایک سنگین غلطی کی جارہی ہے ۔ فواد چودھری کہا کرتے تھے کہ میڈیا کا بزنس ماڈل ہی ٹھیک نہیں کیوں کہ یہ ماڈل حکومتی اشتہارات پر انحصار کرتے ہوئے وجود میں لایا گیا ہے ۔وہ کہا کرتے تھے کہ ان اشتہارات کی بنیاد پر ماضی کی حکومتیں اپنا بیانیہ بنواتی رہی ہیں ، اپنے حق میں خبریں اور مضامین چھپواتی رہی ہیں ،یوں ان کے بقول اس میڈیا نے اپنی ساکھ برباد کر لی ۔ لیکن اب ایک بار پھر ایک نیا بزنس ماڈل اس بنیاد پر استوار ہونے والا ہے ۔ یوٹیوبرز کو اشتہارات ملیں گے اور نئی انڈسٹری وجود میں آئے گی۔ اب بھی تو یہی ہو گا ، اشتہارات کے حصول کے لیے یو ٹیوبرز حکومت کے حق میں ویڈیوز بنائیںگے اور مال کمائیں گے۔ بہت سے سرمایہ دار اس انڈسٹری میں سرمایہ کاری کریں گے ، آنے والی حکومتوں میں اشتہارات کی بندر بانٹ کے لیے ماضی جیسے حربے استعمال ہوں گے ۔نتیجے میں سوشل میڈیا بھی ویسا ہی ہو جائے گا جیسا کہ اب مین سٹریم میڈیا پر الزام لگایا گیا ہے ۔ پھر مستقبل میں کوئی حکومت اسے فلاپ ماڈل قرار دے کر اشتہارات کھینچ لے گی تو ایک اور انڈسٹری دھڑام سے زمین پر آ گرے گی۔
پچھلے دنوںحکومت کی جانب سے اخبارات کے اشتہارات کی واجب الادا رقم کی ادائیگی کے حوالے سے ایک اجلاس ہوا جس میںکئی اخبارات کے مالکان شریک ہوئے ۔ اس اجلاس کی صدارت وفاقی وزیر شفقت محمود نے کی۔ بہت سے لوگوں کے سامنے پہلی مرتبہ یہ حیران کن انکشاف ہوا کہ اس حکومت نے اخبارات کو 2ارب 65 کروڑ روپے کے اشتہارات دیے ۔ جب پوچھا گیا کہ یہ اشتہارات کن اخبارات کو دیے گئے تو ایسے گھوسٹ اخبارات کی فہرست سامنے آئی جن کے نام ہی کسی نے نہ سنے تھے۔ خود شفقت محمود کے لیے بھی یہ بات شاید حیرت کا باعث بنی ہو۔ اجلاس میں شریک بیرسٹر شہزاد اکبر نے ان اخبارات کو اشتہارات جاری کرنے کے حوالے سے انکوائری کا عندیہ بھی دیا۔اس سے تاثر یہ ملا کہ فردوس عاشق اعوان بدعنوانی میں ملوث رہی ہیں۔ یہ انکوائری جلد ہو جانی چاہیے تا کہ اگر کرپشن ہوئی ہے تو بھی سامنے آئے اور نہیں ہوئی تو خواہ مخواہ فردوس عاشق کے نام پر ’’تاثر‘‘ کا دھبہ نہ لگا رہے ۔
اس حکومت میںیہ پہلی بار نہیں ہوا کے کسی وزیر یا مشیر کے جانے کے بعد اس پر کرپشن کا الزام لگا ہو۔ عامر کیانی کو ہٹایا گیا تو کرپشن کے الزامات لگے ، تحقیقات نہیں ہوئیں۔ بابربن عطا کو ہٹایا گیا، کرپشن کے سنگین الزامات لگائے گئے، تحقیقات نہیں ہوئیں۔ جہانگیر ترین بھی کرپشن کے الزامات کے ساتھ دور کر دیے گئے۔جس روز فردوس عاشق اعوان کو ہٹایا گیا ، پی ٹی وی میں کی جانیوالی انکی مبینہ بے ضابطگیوں اور اختیارات سے تجاوز کے حوالے سے رپورٹرز کو ٹکرز جاری کیے گئے اور کہا گیا کہ اسے ذرائع سے چلا یا جائے ۔ ہر وزیر یا ذمہ دار کو گھر بھیجنے کے بعد اس کی کردار کشی ضروری ہے کیا؟ یہاں حکومت پر سوال اٹھتا ہے کہ اگر کسی نے کرپشن کی ہے تو انکوائری کر کے اسے سزا کیوں نہ دی گئی اور اگر نہیں کی تو یہ تحقیقات کیوں نہیں کی گئیں کہ ان کی کردار کشی کے لیے پرائم منسٹر ہائوس سے مہم چلانے کا کام کون کرتا ہے؟
مختصر یہ کہ میڈیا کے حکومت سے تعلقات تبھی ٹھیک ہو سکتے ہیں جب وزیر اعظم عمران خان خود ایسا چاہیں ۔ فی الوقت یہ کہنا مشکل ہے کہ وہ ایسا چاہیں گے۔



کیا میڈیا سے اچھے تعلقات وزیر اعظم کی ترجیح ہے ؟

لاک ڈائون کے دوران ڈرامہ سیریل ارطغرل دیکھ کر میں نے زندگی کی سات حقیقتوں کے بارے میں سیکھا۔ مقصدسے اہم کوئی چیز نہیں ، خوف سے نجات ضروری ہے ، غصے پر قابوپانا اہم ہے، کامیابی پر یقین رکھنا، غداری کا توڑکرنااور سازشوں کا جوا ب ڈھونڈنا ناگزیر ہے۔دانائی مومن کی میراث ہے اور اگر یہ نعمتیں عطا ہو جائیں توانسان کو کامیاب ہونے سے کوئی روک نہیں سکتا۔
میں نے سیکھا کہ انسان کی زندگی میں سب سے زیادہ اہمیت کی حامل جو چیزہونی چاہیے وہ ’’مقصد‘‘ ہے ۔رشتہ داریاں ، تعلقات ، دوستی اور دشمنی سب کم حیثیت کی چیزیں ہیں۔مقصد ان سب سے بڑھ کر ہے ۔اصل اہمیت نصب العین کو حاصل ہے۔ جب مقصد بڑا ہوتا ہے تو قربانی کا جذبہ خود بخود پیدا ہوجاتا ہے، مقصد کے حصول کی خاطر اپنی سب سے قیمتی چیزوں کی قربانی بھی کوئی معنی نہیں رکھتی ۔ زمین، قبیلہ، بھائی بہن، دوست احباب اور مال و اسباب۔ مقصد کے حصول کے لیے سب کچھ قربان کیا جا سکتا ہے ۔
میں نے سیکھا کہ خوف صلاحیتوں کو کھاجاتا ہے ۔نقصان کا خوف،اقتدار، مال ، جان ، اولاد ، ناموس اور اختیار چھن جانے کا خوف۔ہار جانے کا خوف۔ خوف آگے بڑھنے سے روکتا ہے ، قدم اٹھاتے وقت اعتماد کا دشمن بن جاتا ہے ، وسوسے اور واہمے پیدا کرتا ہے ۔جس کے نتیجے میں کامل یقین کے ساتھ حکمت عملی بنانے میں دشواری پیدا ہوتی ہے ، سقم باقی رہ جاتاہے ، ہار مقدر بن جاتی ہے ، خوف جیت جاتا ہے اور اس کے نتیجے میں کمزوری انسان کے اندر گھر کر لیتی ہے جو ہمیشہ سائے کی طرح اس کا پیچھا کرتی ہے ۔ لہذا اگر آغاز سفر میں ہی خوف سے نجات حاصل کر لی جائے تواعتماد بڑھ جاتا ہے ،کامیابی کے امکانات روشن ہو جاتے ہیں۔
میں نے سیکھا کہ غصہ انسان کی بہت بڑی کمزوری ہے اور اس سے بھی بڑھ کر غصے کا برملا اظہار۔ غصہ حکمت عملی بنانے کی صلاحیت ختم کر دیتا ہے ،یہ انسان سے غلطیاں کراتا ہے۔ غصے میں کیے گئے فیصلے اکثر اوقات مبنی بر حقائق نہیں ہوتے ۔ غصہ سوچنے سمجھنے کا موقع نہیں دیتا۔عین اُس وقت جب حریف نہایت باریک بینی اور مہارت کے ساتھ حکمت عملی بنا رہا ہوتا ہے ۔غصے میں مبتلا شخص سطحی فیصلے کر رہا ہوتا ہے ۔ حالات کا صحیح تجزیہ اس کے بس میں نہیں رہتا اور شکست اس کا مقدر بن جاتی ہے ۔
میں نے سیکھا کہ یقین ایک طاقت کا نام ہے جو ہر لمحے آپ کی مددگار ہوتی ہے ۔ مقصد کے صحیح ہونے کا کامل یقین۔مقصد کے حصول کے لیے راستے کے صحیح انتخاب کاپختہ یقین۔ صحیح راستے پر مستقل مزاجی سے کاربند رہنے کا عزم اور حتمی جیت کا کامل یقین۔ یقین ایمان کی طرح ہے جس سے لمحے کو بھی ہٹایا نہیں جا سکتا۔یقین کمزور لمحے میں طاقت بن جاتا ہے ۔ یقین حوصلہ دیتا ہے ، آگے بڑھنے کی قوت پیدا کرتا ہے اور مایوسی سے بچاتاہے۔ یقین کے بغیر راستہ طویل ہو جاتا ہے ، مشکلات خوف میں مبتلا کر کے واپس لوٹ جانے کو مجبور کر دیتی ہیں۔ یقین نہ ہو تو انسان جانتے بوجھتے ہوئے دشمن کی چالوں کا شکار ہو جاتا ہے ۔ گویا یقین کے بغیرمقصد کا حصول نا ممکن ہے ۔
میں نے سیکھاکہ دھوکہ اور غداری انسان کے ساتھ ساتھ چلتی ہیں ۔دھوکہ دل توڑنے کا باعث تب بنتاہے جب کسی سے ضرورت سے زیادہ توقعات وابستہ کر لی جائیں۔جب انسان دھوکہ دہی کو انسانی فطرت تسلیم کر کے آنکھیں کھلی رکھنے کا فن سیکھ لے تو یہ الٹا اس کی طاقت بن جاتی ہے ۔ غدار کو تلاش کرنا اور اسے اس کے انجام تک پہنچانا کامیابی کی دلیل ہے ایسا نہ کرنے کی صورت میں حریف آپ کو چاروں شانے چت کر دے گا ،ناقابل تلافی غلطی کا ازالہ ممکن نہ رہے گا اور پچھتاوا مقدر بن جائے گا ۔
میں نے سیکھا کہ سازش کرنے والے کبھی چین سے نہیں بیٹھتے۔ذاتی مفادات اور حسد کی بنیادپر ہر وقت سازش کا جال بنتے رہتے ہیں ۔ سازش کا جواب حکمت عملی سے دیا جا سکتا ہے ۔سازشیوں کو کامیاب ہونے دینے کا مطلب اپنی ناکامی کو دعوت دینا ہے ۔ لہذا کامیابی کے حصول کے لیے لازم ہے کہ سازشوں کا توڑساتھ ساتھ ہوتا رہے یعنی سفر کے دوران راستے میں آنے والے کانٹوں کو ساتھ ساتھ ہٹایا جاتا رہے تاکہ وہ مسافر کو زخمی کرنے کا باعث نہ بنیں۔
میں نے سیکھا کہ دانائی، سوجھ بوجھ اور فہم و فراست قدرت کی عطا ہے یہ ہر کسی کو نصیب نہیں ہوتی۔نیک نیت لوگ بھی اگر فہم و فراست سے عاری ہوں تو کامیابی کو نہیں پہنچ سکتے۔دانائی سے عاری فیصلے نیک نیتی پر مبنی ہی کیوں نہ ہوں انسان کوقابل رحم حالت میں مبتلاکر سکتے ہیں۔ دانائی مومن کی میراث ہے،یہ اس کا سب سے بڑا ہتھیار ہے۔ خیال غیب سے انسان کے ذہن میں آتاہے جو کسی بھی کام کے آغاز کی تحریک بنتاہے ۔دانائی دانا لوگوں کی محفل سے ملتی ہے ۔ دانا لوگ علم اور دانائی کے ذریعے انسان کے اندر یقین کی شمع روشن کرتے ہیں ، صحیح راستہ سجھانے میں معاونت کرتے ہیں ۔ پریشانیوں سے نجات دلاتے ہیں ، یکسوئی پیدا کرنے میں مدد گار ہوتے ہیں اور اطمینان قلب کا باعث بنتے ہیں۔
میں نے سیکھا کہ پیسہ اور عورت انسان کی بڑی کمزوریاںہیں۔ انسانی فطرت کو ذہن میں رکھتے ہوئے عورت اور پیسے کوہمیشہ بطور ہتھیار استعمال کیا گیا ہے ۔ دشمن کی سازش میں استعمال ہونے والا یہ نہایت مہلک ہتھیار ہے ۔اس ہتھیار کا وار جھیلنے کے لیے کردار کی مضبوطی نہایت اہم ہے ۔ ان کمزوریوں کا حامل شخص کامیابی کا تصور بھی نہیں کر سکتا۔
میں نے سیکھا کہ مقصد ہی سب کچھ ہے ، چھوٹا اور عارضی نہیں ،بڑا اور دائمی مقصد۔ بڑامقصد بڑا سوچنے سے پیدا ہوتا ہے جس کے حصول کی جدو جہد انسان کو ہر لمحہ نکھارتی ہے ۔ مقصد حاصل ہو جائے تو کیا کہنے اور نہ بھی ہو تو آنے والوں کے لیے مشعل راہ بن جاتا ہے ۔



ڈرامہ سیریل ارطغرل سے جو میں نے سیکھا

Petrol Price Increase Honay K Effects Ana Shru Ho Gaye | Petrol Price | Increase | Effects |

Petrol Price Hike: What is government's final plan? | Asad Ullah Khan

Asadullah Khan Reporting from Srinagar Highway || Women & Children stuck | Long March

Supreme Court's Rapid Questions to Attorney General on Road Blockage || Details by Asad Ullha Khan

All Roads towards Islamabad are Closed | How Asadullah Khan reached Supreme Court?

Will Imran Khan be able to reach Islamabad? | Asad Ullah Khan

Formula of Rana Sana Ullah to stop long march by arresting 1273 people | Asad Ullah Khan

PM & CM appears before FIA Court in Money Laundering Case today | 21-May-2022 | Asad Ullah Khan

Imran Khan Multan Jalsa, why he didn't announce any date for Islamabad march? | Asad Ullah Khan

Breaking News: Hamza out , Punjab gone | Asad Ullah Khan

Most important 60 questions in current situation | Asad Ullah Khan

Unbelievable economic report of PTI govt's last year 2021-22 | Asad Ullah Khan

What is happening in Islamabad right now? | Asad Ullah Khan

Imran Khan active after supreme court decision | Asad Ullah Khan

Breaking News: Nawaz Sharif gave the name for Care Taker Lady Prime Minister | Asad Ullah Khan

Breaking News: Govt can announce Elections on 21 | Asad Ullah Khan

What happened in Sialkot today? who was at fault PTI or administration? | Asad Ullah Khan

Why Imran Khan is crossing the red lines? | Asad Ullah Khan

Three prominent News from Today's Newspapers | Asad Ullah Khan

Abid Sher Ali finally coming to Pakistan to take oath | future of care-taker setup | Asad Ullah Khan

London Updates, how funny is Bilawal's claim about Martial Law | Asad Ullah Khan

What is happening in London? What is expected tomorrow? | Asad Ullah Khan

Biggest Jalsa in the history of Jehlum | Asad Ullah Khan

Tension, Tension and Tension, what will happen now? | Asad Ullah Khan

Imran Khan's strong reply to Shahbaz Sharif | Asad Ullah Khan

Imran Khan ready for his final move | Asad Ullah Khan

PMLN plans to ''Conquer'' Governor House | Asad Ullah Khan

Meeting with PM Shahbaz Sharif today |  Asad Ullah Khan

How Pakistani Newspaper covered the speeches of Imran Khan and Maryam Nawaz | Asad Ullah Khan

Big Political day after Eid | Asad Ullah Khan

Big decision of PTI against Judges of LHC | Asad Ullah Khan

Breaking News: Nawaz Sharif tells the secret why he agreed on Regime Change Plan | Asad Ullah Khan

Nawaz Sharif Could not go to Mosque for Namaz-e-Eid | Asad Ullah Khan

Who played the dirty game in the last days of Imran Khan? Khan tells the story | Asad Ullah Khan

Asad Ullah Khan Latest Talk Shows and Vlogs Videos

Columns